खेळ 

दिस उगवे कष्टाचा
माझ्या कोवळया आभाळी
देई जगण्याची आस 
जरी दैन्य माझ्या भाळी

खेळ दावता दावता
बाप अर्ध्यावर गेला 
चतकोर घासासाठी 
खेळ नशिबाचा झाला 

दोन भावंडे लहान 
आई आजारी घरात 
घर चालवाया माझी 
रोज बाजारी वरात

ऊन तळपते माथी 
भूक आतडयांना जाळी
दोर काठयांना बांधुन
देह झुले अंतराळी 

तोल सावरते आता 
हाती घेवुनिया काठी 
डोंबा-याच्या नशिबात 
कुठे शाळा कुठे पाटी 
****************
 उत्तम सदाकाळ