मेघराजा
धाव घे रे मेघराजा
वाट पाहू आता किती
धो धो बरस रे असा
चिंब होऊदे ही माती

खुरटला सारा चारा
गाईगुरे व्याकुळली
चिडीचिप झाले रान
नदी भासाने चळली

डोळे लावून आभाळी
बळी रानात पांगला
धीर सुटल्या जीवाने
फास झाडाला टांगला

अरे सोड तुझा ताठा
येई नाचत झिम्माड
तुझ्याविना दुनियेला
पड़े जगण्याचं कोडं

तुझ्या प्रेमळ स्पर्शाने
रान हिरवं होऊ दे
कर बळीला पेरता
जग सुखात राहु दे
*************
उत्तम सदाकाळ
9011016655

खेळ 

दिस उगवे कष्टाचा
माझ्या कोवळया आभाळी
देई जगण्याची आस 
जरी दैन्य माझ्या भाळी

खेळ दावता दावता
बाप अर्ध्यावर गेला 
चतकोर घासासाठी 
खेळ नशिबाचा झाला 

दोन भावंडे लहान 
आई आजारी घरात 
घर चालवाया माझी 
रोज बाजारी वरात

ऊन तळपते माथी 
भूक आतडयांना जाळी
दोर काठयांना बांधुन
देह झुले अंतराळी 

तोल सावरते आता 
हाती घेवुनिया काठी 
डोंबा-याच्या नशिबात 
कुठे शाळा कुठे पाटी 
****************
 उत्तम सदाकाळ

पाऊस

पाऊस
पाऊस पानातला
वाजतोय झिम्माड
टिपरी तालावर
झिंगलेय झाड

पाऊस रानातला
अवखळ अल्लड
घालतोय धिंगाणा
करतोय हुल्लड

पाऊस गावातला
घुमतोय कानात
धारांचे नक्षीकाम
तुडुंब अंगणात

पाऊस शेतातला
हिरवाकंच ओला
मोत्यांनी मढला
पाचूदार शेला

पाऊस मनातला
पापण्यांच्या दारी
सांजवेळी सजणा
दाटलाय उरी
*************
उत्तम सदाकाळ
मढ,जुन्नर
९०११०१६६५५