विसर्जन  मित्रा...आज बाप्पाला आणलेस तू घरात  वाजत गाजत ...हर्षोल्हासात . पण घरातील बापाला  अनाथाश्रमात का पाठवलेस तू ..? गुपचूप... एखादी टाकावू वस्तू फेकून द्यावे तसे. हि कुठली तुझी श्रद्धा ? हि कुठली तुझी भक्ती? मित्रा घरात बसविलेल्या बाप्पाच्या डोळ्यात डोकाव जरा  मग  तुला दिसेल तुझे सारे कर्म... तुझी बेगडी भक्ती ... अरे आज वाटतोयस तू पेढ्यांचा प्रसाद  सा-या गावाला...मोठ्या अभिमानाने. पण स्वत:च्या बापाला  दोन घासासाठी तळमळवताना  काहीच कसे वाटले नाही तुला..? आज मोठ्या दिमाखात बाप्पासाठी तू महागाचे मखर घेवून आलास. अन तेंव्हा बापाला अंथरायला  काय दिले होतेस तू ? एक फाटके पोते..? मित्रा हल्ली तुझ्या घरात बाप्पाला  चुकल्यासारखे वाटतेय...  अनाथाश्रमात धाय मोकलून रडणा-या  तुझ्या बापासाठी  गणपतीबाप्पाचेही काळीज तुटतेय... घरात गणपतीबाप्पाची प्राणप्रतिष्ठापना करणा-या  माझ्या मित्रा, अनाथाश्रमात स्वतःच्या बापाचे विसर्जन करून  अखेर काय साधलेस तू..?            **************              उत्तम सदाकाळ                 9011016655